العيال دول هيستحموا حالا، وهيطلع لهم غيار من هدوم يوسف القديمة، وهيأكلوا لحد ما يشبعوا.” أحمد قرب من أمه بقلة حيلة وضغط على إيده: — “يا أمي بالعقل بس.. إحنا الشقة زحمة بينا بالعافية، وبعدين دول عيال ملهمش ورق، ولو جوز أمهم ده عرف أو بلغ الشرطة هيدخلنا في سين وجيم وقضايا خطف!
إحنا مش قد المشاكل دي!” فاطمة وقفت فجأة، طولها بان وأصابعها شاورت في وش أحمد: — “أنا اللي كبرتك وجوزتك يا أحمد.. وأنا اللي شيلتك أنت وأختك لما أوبكم مات وما مدتش إيدي لحد! الشرطة؟ ياريت يبلغ!
إحنا الصبح هنروح نعمل بلاغ في النيابة وفي خط نجدة الطفل ضد المجرم ده، وبدل ما يخطفهم هيدخل السجــ,,ـــــن وتترد لهم حقوقهم! أما موضوع الشقة زحمة..” سكتت فاطمة ثانية، عينيها حادة زي السيف وهي بتبص لمروة وبعدين ترجع لأحمد: — “أنا بقالي أربع سنين ساكتة ومستحملة وخنقاني الحيطة ومبفتحش بوقي.
. لو الشقة مش واخدانا كلنا يا أحمد، المطرية قريبة ومقدم شقتك اللي بتجمع فيه بقالك أربع سنين تقدر تؤجر بيه شقة وتتوكل على الله من بكرة. . إنما العيال دول مش هيترموا في الشارع وأنا حية على وش الأرض!” الصمت نزل على الصالة زي الصخرة.
أحمد بصل مراته اللي كانت مبلمة ومش عارفة ترد، وبعدين بص لأمه اللي كان باين في عينيها إصرار يهد جبال.. إصرار الست الشبراوية اللي مفيش قوة في الدنيا تقدر تكسر كلمتها. أحمد اتنهد بصوت طالع بالعافية، فرك وشه بإيديه، ودخل أوضته وجاب فوطة ونزل على ركبه قدام الولد الكبير: — “تعال يا بني.
. تعال استحمى الأول.. وأنتي يا مروة.. قومي حضري طاجن أكل كبير يسد عين الشمس.” مروة وقفت ثانية واحدة مشدوهة، بس نظرة واحدة من عين فاطمة خليتها تتحرك زي الساعة. جريت على المطبخ، وبدأت خبطة الحلل والأطباق تسمع في الشقة كلها..
صينية بطاطس بالفراخ ورز بشعرية، أكل يسند قلب العيال اللي مأكلوش وجبة عدلة من شهور. أحمد أخد الولد الكبير والصغير على الحمام، يغسل عنهم طين الشارع وقسوة الأيام، ويوسف كان بيجري بين الأوض يجيب أصغر طقمين عنده وفوط نضيفة، وشه كان منور بفرحة ما تتأوصفش، فرحة حد شال جبل من على صدـ,,ـــره وأخيراً طاله النور.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.